1 ⲁⲩⲱ ⲁϥⲧⲱⲟⲩⲛ ⲁϥⲙⲟⲟϣⲉ ⲓⲱⲛⲁⲑⲁⲛ ϩⲱⲱϥ ⲁϥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ</ab>
2 ⲇⲉ ⲁϥⲓ ⲉϩⲣⲁⲓ ⲉⲛⲟⲉⲙⲁ ⲉⲣⲁⲧϥ ⲛⲁⲭⲓⲙⲉⲗⲉⲭ ⲡⲟⲩⲏⲏⲃ ⲁⲭⲓⲙⲉⲗⲉⲭ ⲇⲉ ⲁϥⲉⲓⲱⲣⲙ ⲛⲧⲉⲣⲉϥⲉⲓ ⲉϩⲟⲩⲛ ⲉϩⲣⲁϥ ⲡⲉϫⲁϥ ⲛⲁϥ ϫⲉ ⲉⲧⲃⲉ ⲟⲩ ⲉⲕⲙⲟⲟϣⲉ ⲙⲁⲩⲁⲁⲕ ⲉⲙⲛϭⲉ ⲗⲁⲁⲩ ⲙⲟⲟϣⲉ ⲛⲙⲙⲁⲕ</ab>
3 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙ ⲡⲟⲩⲏⲏⲃ ϫⲉ ⲡⲣⲣⲟ ⲡⲉ ⲛⲧⲁϥⲟⲩⲉϩⲥⲁϩⲛⲉ ⲛⲁⲓ ⲛⲟⲩϣⲁϫⲉ ⲙⲡⲟⲟⲩ ⲁϥϫⲟⲟⲥ ⲉϩⲟⲩⲛ ⲉϩⲣⲁⲓ ϫⲉ ⲙⲡⲉⲣⲧⲣⲉⲗⲁⲁⲩ ⲉⲓⲙⲉ ⲉⲡϣⲁϫⲉ ⲡⲉϯⲛⲁϫⲟⲟⲩⲕ ⲁⲛⲟⲕ ⲉⲧⲃⲏⲏⲧϥ ⲁⲩⲱ ⲡⲉⲛⲧⲁⲓϩⲱⲛ ⲉⲧⲟⲟⲧⲕ ⲉⲧⲃⲏⲏⲧϥ ⲁⲩⲱ ⲛϣⲏⲣⲉ ϣⲏⲙ ⲁⲓⲣⲙⲛⲧⲣⲉ ⲛⲁⲩ ϩⲙ ⲡⲙⲁ ⲉϣⲁⲩⲙⲟⲩⲧⲉ ⲉⲣⲟϥ ϫⲉ ⲡⲡⲓⲥⲧⲟⲥ ⲙⲡⲛⲟⲩⲧⲉ ⲫⲉⲗⲗⲁⲛⲓⲙ ⲛⲉⲙⲱⲛⲓⲙ</ab>
4 ⲧⲉⲛⲟⲩ ϭⲉ ⲉϣⲱⲡⲉ ⲟⲩⲉⲛϯⲟⲩ ⲛⲟⲉⲓⲕ ⲉⲣⲉⲧⲟⲟⲧⲕ ϯ ⲙⲡⲉⲧⲉⲕⲛⲁϩⲉ ⲉⲣⲟϥ ⲉϩⲣⲁⲓ ⲉⲧⲟⲟⲧ</ab>
5 ⲡⲟⲩⲏⲏⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉ ⲙⲛ ⲟⲉⲓⲕ ⲉϥϫⲁϩⲙ ⲉⲣⲉⲧⲟⲟⲧⲛ ⲛⲥⲁ ⲛⲉⲟⲉⲓⲕ ⲉⲧⲟⲩⲁⲁⲃ ⲛⲧⲉⲡⲣⲟⲑⲏⲥⲓⲥ ⲉϣⲱⲡⲉ ϭⲉ ⲛϣⲏⲣⲉ ϣⲏⲙ ⲥⲉⲧⲃⲃⲏⲩ ⲉⲥϩⲓⲙⲉ ⲉⲩⲉϣⲟⲩⲱⲙ ⲛϩⲏⲧⲟⲩ</ab>
6 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲟⲩⲏⲏⲃ ϫⲉ ⲁϩⲉ ⲁⲛⲥⲁϩⲱⲱⲛ ⲉⲃⲟⲗ ⲛⲥϩⲓⲙⲉ ⲛϫⲓⲛ ⲥⲁϥ ⲁⲩⲱ ⲛϫⲓⲛ ϣⲙⲛⲧ ⲙⲡⲟⲟⲩ ϩⲙ ⲡⲧⲣⲉⲛⲧⲁⲁⲛ ⲉⲃⲟⲗ ⲉⲧⲉϩⲓⲏ ⲁⲛϣⲏⲣⲉ ϣⲏⲙ ⲧⲏⲣⲟⲩ ⲧⲃⲃⲟⲟⲩ ⲁⲩⲱ ⲧⲉϩⲓⲏ ⲉⲧⲉⲕϣⲁϫⲉ ⲉⲣⲟⲥ ⲥϫⲁϩⲙ ⲙⲡⲟⲟⲩ ⲇⲉ ⲉⲥⲛⲁⲧⲃⲃⲟ ⲉⲧⲃⲉ ⲛⲁⲥⲕⲏⲩⲉ</ab>
7 ⲁⲩⲱ ⲁⲭⲓⲙⲉⲗⲉⲭ ⲡⲁⲣⲭⲓⲉⲣⲉⲩⲥ ⲁϥϯ ⲛⲁϥ ⲛⲛⲉⲟⲉⲓⲕ ⲛⲧⲉⲡⲣⲟⲑⲉⲥⲓⲥ ⲉⲙⲛϭⲉ ⲟⲉⲓⲕ ⲙⲙⲁⲩ ⲛⲥⲁ ⲛⲉⲧⲕⲏ ⲉϩⲣⲁⲓ ϩⲓⲑⲏ ⲙⲡϫⲟⲉⲓⲥ ⲉⲧⲉⲡⲟⲉⲓⲕ ⲡⲉ ⲛⲧⲁⲩϥⲓⲧϥ ϩⲓⲑⲏ ⲙⲙⲟϥ ⲉⲕⲁ ⲕⲉⲟⲩⲁ ⲉϩⲣⲁⲓ ⲉϥϩⲏⲙ ⲏ ⲉϥⲣⲟⲟⲩⲧ ⲙⲡⲉϩⲟⲟⲩ ⲛⲧⲁϥϫⲓⲧⲟⲩ</ab>
8 ⲛⲉⲣⲉⲟⲩⲁ ⲇⲉ ⲛⲛⲉϩⲙϩⲁⲗ ⲛⲥⲁⲟⲩⲗ ⲙⲙⲁⲩ ⲙⲡⲉϩⲟⲟⲩ ⲉⲧⲙⲙⲁⲩ ⲉϥϭⲏⲡ ⲉⲙⲛⲧϥⲡⲁⲣⲣⲏⲥⲓⲁ ⲙⲙⲁⲩ ⲛⲁϩⲣⲁϥ ⲙⲡⲉϥϫⲟⲉⲓⲥ ⲉⲡⲉϥⲣⲁⲛ ⲡⲉ ⲇⲱⲏⲕ ⲡⲓⲇⲟⲩⲙⲁⲓⲟⲥ ⲉϥⲙⲟⲟⲛⲉ ⲛⲛⲉⲙⲁⲥⲡⲟⲣⲕ ⲛⲥⲁⲟⲩⲗ</ab>
9 ⲁⲩⲱ ⲇⲁⲩⲉⲓⲇ ⲡⲉϫⲁϥ ⲛⲁⲭⲓⲙⲉⲗⲉⲭ ϫⲉ ⲁⲛⲁⲩ ϫⲉ ⲟⲩⲛ ⲟⲩⲗⲟⲅⲭⲏ ϣⲟⲟⲡ ϩⲁ ⲧⲟⲟⲧⲕ ϩⲙ ⲡⲉⲓⲙⲁ ⲏ ⲟⲩⲥⲏϥⲉ ϫⲉ ⲧⲁⲥⲏϥⲉ ⲁⲩⲱ ⲛⲁⲥⲕⲏⲩⲉ ⲙⲡⲓⲉϣⲉⲛⲧⲟⲩ ⲉⲃⲟⲗ ⲛⲙⲙⲁⲓ ⲉⲃⲟⲗ ϫⲉ ⲡϣⲁϫⲉ ⲛⲧⲁⲡⲣⲣⲟ ϩⲱⲛ ⲙⲙⲟϥ ⲉⲧⲟⲟⲧ ϥϣⲟⲟⲡ ϩⲛ ⲟⲩⲛⲟϭ ⲛⲟⲩⲉϩⲥⲁϩⲛⲉ</ab>
10 ⲡⲟⲩⲏⲏⲃ ⲇⲉ ⲡⲉϫⲁϥ ⲛⲁϥ ϫⲉ ⲉⲓⲥ ⲧⲥⲏϥⲉ ⲛⲅⲟⲗⲓⲁⲑ ⲡⲁⲗⲗⲟⲫⲩⲗⲟⲥ ⲡⲁⲓ ⲛⲧⲁⲕϩⲟⲧⲃⲉϥ ϩⲙ ⲡⲉⲓⲙⲁ ⲛⲉⲙⲁⲑ ⲥⲕⲏ ⲉϩⲣⲁⲓ ⲙⲡⲉⲓⲙⲁ ⲁⲩⲱ ⲥϭⲗⲉⲙⲗⲱⲙ ⲛⲟⲩϩⲟⲉⲓⲧⲉ ⲉϣⲱⲡⲉ ϭⲉ ⲕⲟⲩⲁϣⲥ ϫⲓⲧⲥ ϫⲉ ⲙⲛ ⲕⲏⲧⲉ ⲙⲡⲉⲓⲙⲁ ⲛⲥⲁ ⲧⲁⲓ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲉϣϫⲉ ⲙⲛ ⲕⲏⲧⲉ ⲛⲥⲁ ⲧⲁⲓ ⲙⲁ ⲛⲁⲓⲥ</ab>
11 ⲁϥⲧⲁⲁⲥ ⲛⲁϥ ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ϩⲁ ⲡϩⲟ ⲛⲥⲁⲟⲩⲗ ⲁⲩⲱ ⲇⲁⲩⲉⲓⲇ ⲁϥⲓ ⲉⲣⲁⲧϥ ⲛⲁⲭⲟⲩⲥ ⲡⲣⲣⲟ ⲛⲅⲉⲑ</ab>
12 ⲛϩⲙϩⲁⲗ ⲇⲉ ⲛⲁⲭⲟⲩⲥ ⲡⲉϫⲁⲩ ⲛⲁϥ ϫⲉ ⲙⲡⲁⲓ ⲁⲛ ⲡⲉ ⲡⲣⲣⲟ ⲙⲡⲕⲁϩ ⲙⲏ ⲙⲡⲁⲓ ⲁⲛ ⲡⲉ ⲇⲁⲩⲉⲓⲇ ⲡⲉⲛⲧⲁⲩⲉⲓ ⲉⲃⲟⲗ ϩⲁ ⲧⲉϥϩⲏ ⲛϭⲓ ⲛⲉϩⲓⲟⲙⲉ ⲉⲧⲭⲟⲣⲉⲩⲉ ⲉⲩϫⲱ ⲙⲙⲟⲥ ϫⲉ ⲥⲁⲟⲩⲗ ⲁϥⲡⲁⲧⲁⲥⲥⲉ ϩⲛ ⲛⲉϥϣⲟ ⲇⲁⲩⲉⲓⲇ ϩⲱⲱϥ ϩⲛ ⲛⲉϥⲧⲃⲁ</ab>
13 ⲇⲁⲩⲉⲓⲇ ⲁϥⲕⲁⲛⲉⲓϣⲁϫⲉ ϩⲙ ⲡⲉϥϩⲏⲧ ⲁⲩⲱ ⲁϥⲣϩⲟⲧⲉ ⲉⲙⲁⲧⲉ ϩⲁⲑⲏ ⲛⲁⲭⲟⲩⲥ ⲡⲣⲣⲟ ⲛⲅⲉⲑ</ab>
14 ⲁⲩⲱ ⲁϥϣⲓⲃⲉ ⲙⲡⲉϥⲥⲙⲟⲧ ⲙⲡⲉϥⲙⲧⲟ ⲉⲃⲟⲗ ⲁϥϭⲱ ⲉϥⲉϣϭⲁ ϭⲓϫ ϩⲓⲣⲛ ⲛⲣⲟ ⲛⲧⲡⲩⲗⲏ ⲛⲧⲡⲟⲗⲓⲥ ⲉⲁϥⲣⲑⲉ ⲛⲛⲉⲧⲡⲟϣⲥ ⲛϩⲏⲧ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲛⲉϥϯϭⲗⲁ ⲉⲡⲓⲥⲁ ⲙⲛ ⲡⲁⲓ ⲙⲡⲉⲩⲉⲙⲧⲟ ⲉⲃⲟⲗ ⲉϥϩⲏⲩ ⲉϩⲣⲁⲓ ϩⲓⲣⲉⲛ ⲛⲉⲣⲟ ⲛⲧⲡⲩⲗⲏ ⲉⲣⲉⲛⲉϥϫⲓϩ ϣⲟⲩⲟ ⲉϫⲛ ⲧⲉϥⲙⲟⲣⲧ</ab>
15 ⲡⲉϫⲉⲁⲭⲟⲩⲥ ⲛⲛⲉϥϩⲙϩⲁⲗ ϫⲉ ϭⲱϣⲧ ⲛⲧⲉⲧⲛⲛⲁⲩ ⲉⲡⲉⲓⲣⲱⲙⲉ ⲉϥⲡⲟϣⲥ ⲛϩⲏⲧ ⲉⲧⲃⲉ ϫⲉ ⲁⲧⲉⲧⲛⲛⲧϥ ⲛⲁⲓ ⲉϩⲟⲩⲛ</ab>
16 ⲏ ⲉⲓϣⲁⲁⲧ ⲁⲛⲟⲕ ⲛⲣⲱⲙⲉ ⲉϥⲡⲟϣⲥ ⲛϩⲏⲧ ⲉⲃⲟⲗ ϫⲉ ⲁⲧⲉⲧⲛⲉⲓⲛⲉ ⲙⲡⲁⲓ ⲉϩⲟⲩⲛ ⲛⲁⲓ ⲉⲧⲣⲉϥⲣⲛⲉⲓⲥⲙⲟⲧ ⲛⲁϩⲣⲁⲓ ⲡⲁⲓ ⲉϥⲛⲁⲣⲡϩⲟⲩⲛ ⲁⲛ ⲛⲏⲓ</ab>